Ráiteas Tosaigh an Phríomhoifigigh Feidhmiúcháin

Cáilíocht Uisce agus Barr Feabhais Eolaíochta

Tugaimid tús áite i gcónaí do sholáthar uisce óil atá sábháilte agus glan fós. In 2025, lean soláthairtí uisce poiblí na hÉireann le caighdeáin den scoth a bhaint amach, ag comhlíonadh 99.8% maidir leis na Rialacháin maidir le hUisce Óil (de réir Cáilíocht Uisce Óil i Soláthairtí Poiblí 2024 de chuid GCC a foilsíodh in 2025). Léirítear leis an bhfeidhmíocht sin tiomantas na bhfoirne agus neart ár gcóras monatóireachta. Ba gharsprioc mhór na bliana í oscailt ár Saotharlainne Náisiúnta i Luimneach i mí Lúnasa 2025, lena gcuirtear go mór lenár n-acmhainn eolaíoch agus theicniúil. Leis an tsaoráid den scoth sin, tacófar le tástáil, taighde agus nuálaíocht ardleibhéil ar cháilíocht an uisce lena gcinntítear go bhfuil Uisce Éireann chun cinn i gcónaí i dtaca leis an tsláinte phoiblí a chosaint agus ceanglais rialála a chomhlíonadh sna blianta atá amach romhainn.

Cultúr Sábháilteachta agus Earcaíocht: Infheistiú i nDaoine

Is mór an tairbhe dúinn ár ndaoine. Tá aistriú bhaill foirne na seirbhísí uisce ó hÚdaráis Áitiúla go hUisce Éireann ina bhunchloch dár n-athrú ó bhonn, agus táimid tiomanta do thacaíocht a thabhairt dár gcomhghleacaithe ar fad tríd an tréimhse athraithe sin. Tá earcaíocht agus comhtháthú daoine nua, taobh le hinfheistíocht sa teicneolaíocht agus san oiliúint ag cur le neartú ár n-eagraíochta agus lenár gcumas déanamh de réir ár mbriathair do chustaiméirí agus do phobail. Tharla bristeacha fairsinge cumhachta agus cumarsáide ar fud na hÉireann mar gheall ar Stoirm Éowyn, ceann de na stoirmeacha ba dhéine i ngeimhreadh 2024/25, agus cuireadh brú suntasach ar an mbonneagar criticiúil náisiúnta, agus táim bródúil as an gcaoi a d’fhreagair ár n-eagraíocht. Trí ullmhacht láidir, pleanáil réamhghníomhach agus tiomantas ár bhfoirne, choinníomar leanúnachas soláthair ar bun do na céadta mílte custaiméirí in ainneoin bristeacha fairsinge cumhachta. Bhí úsáid réamhchoisctheach giniúna cúltaca agus comhordú náisiúnta 24/7 trínár nIonad Náisiúnta Bainistíochta Oibríochtaí lárnach sa fhreagairt sin. Bhí ár ndaoine ag obair gan stad gan staonadh i ndálaí dúshlánacha chun an t sláinte phoiblí a chosaint agus na seirbhísí a thabhairt ar ais go sábháilte. I ndiaidh an eispéiris sin, treisíodh an luach maidir le hinfheistíocht leanúnach in athléimneacht agus adhaimsir ag tarlú níos minice anois.

Is croíluach dúinn é go gcoinneoimid a chéile sábháilte. Creidimid nach bhfuil aon ghníomh chomh tábhachtach nó chomh práinneach sin nach féidir é a dhéanamh ar bhealach sábháilte. Cuirimid ar chumas fostaithe agus ár gcomhpháirtithe seachadta tríú páirtí obair a stopadh má cheapann siad nach bhfuil sé sábháilte leanúint ar aghaidh. Is í an tsábháilteacht an rud is tábhachtaí. Go tragóideach, fuair dhá dhuine bás i mbliana ar láithreáin seachadta tríú páirtí faoi rialú comhpháirtithe. Ar an 18 Meán Fómhair 2025, tharla timpiste marfach do dhuine a bhí ag obair ar son duine dár gcomhpháirtithe seachadta tríú páirtí le linn oibreacha ag Baile Choitín i gCorcaigh. Tharla teagmhas marfach ar leith ar an Satharn, an 29 Samhain a bhain le duine a bhí ag obair do dhuine dár gcomhpháirtithe soláthair tríú páirtí ar thionscadal seachadta d’uasghrádú bonneagair i Maigh Eo. Tá an dá theagmhas á bhfiosrú faoi láthair leis an Údarás Sláinte agus Sábháilteachta. In 2026, leanfaimid dár bhfócas ar oideachas agus ar oiliúint feasachta maidir leis na rioscaí agus na contúirtí a bhaineann le gníomhaíocht tógála.

Deiseanna a Chruthú

In ainneoin dul chun cinn suntasach, tá dúshláin nach beag ós comhair Uisce Éireann go fóill. Bíonn cothabháil mhór, uasghráduithe nó athsholáthar de dhíth ar go leor sócmhainní chun freastail ar riachtanais nua-aimseartha agus ar éileamh amach anseo. Tugtar tús áite fós do sheanfhadhbanna amhail dídhathú uisce agus an Bonneagar arna Sholáthar ag an bhForbróir (BSF), agus tá infheistíocht leanúnach agus nuálaíocht de dhíth chun seirbhísí uisce sábháilte agus iontaofa a chinntiú do gach pobal. Tá aistriú leanúnach bhaill foirne sheirbhísí uisce na nÚdarás Áitiúil go hUisce Éireann casta, agus is é an sprioc comhtháthú iomlán faoi dheireadh 2026. Trí mheán an aistrithe sin, cuirtear deiseanna ollmhóra ar fáil chun fóntas náisiúnta aonair a chruthú ach éilítear pleanáil chúramach agus caidreamh gníomhach chun tacú le comhghleacaithe le linn an aistrithe.

Déanann Uisce Éireann rannpháirtíocht shuntasach go díreach le hionadaithe tofa agus le hionadaithe poiblí trí bhealaí díreacha gutháin agus ríomhphoist, ceardlanna, cruinnithe, agus seisiúin eolais do Chomhairleoirí, do TDanna, agus do Sheanadóirí, agus caidreamh gníomhach aghaidh ar aghaidh le hionadaithe ón Rialtas agus ón bhFreasúra. Mar sin féin, sainaithnímid an gá le hathbhreithniú a dhéanamh ar an gcaoi a mbainistímid na hidirghníomhaíochtaí sin agus chun feabhas a chur ar na seirbhísí atá á gcur ar fáil. In 2026, déanfaidh an eagraíocht athbhreithniú foirmiúil ar ár gcaidreamh gníomhach le hionchur ón ngnólacht ar fad agus le béim ar leith ar an gcaoi is féidir an tseirbhís thábhachtach agus seoladh faisnéise faoina ngníomhaíochtaí agus faoina n-oibríochtaí ar fud Éireann a fheabhsú.

Roimhe seo, mar gheall ar phróisis pleanála agus rialála, cuireadh moilleanna do-ghlactha ar sheachadadh bonneagair chriticiúil, lenar cuireadh bac ar aon dul chun cinn ar feadh an iomarca ama. Táim meáite air go sáróimid na baic sin, agus táim bródúil as ionadaíocht a dhéanamh ar son Uisce Éireann ar an gCoiste Stiúrtha do Thascfhórsa um Luathú Bonneagair an Rialtais, a bunaíodh chun dul i ngleic leis na dúshláin chórasacha maidir le seachadadh an bhonneagair náisiúnta. Chuidigh Uisce Éireann go gníomhach leis an obair sin, lena n-áirítear saineolaithe ag a bhfuil taithí a fháil ar iasacht chun tacú le comhoibriú tras-rialtais. D’fhoilsigh an Tascfhórsa Plean Gníomhaíochta 30 pointe i mí na Nollag 2025, ina leagtar amach athchóirithe spriocdhírithe chun an phleanáil, an ceadú agus an seachadadh maidir le bonneagar a luathú ar fud an Stáit. Trí mheán na hoibre sin leis an Rialtas agus leis na príomhpháirtithe leasmhara, tá cur chun feidhme á spreagadh againn go tapa chun a chinntiú nach saineofar ár dtodhchaí leis na moilleanna a tharla san am atá thart.

Tá an-tábhacht ag baint leis na baic sin a bhaint chun fás tithíochta a chruthú agus chun líonraí uisce agus fuíolluisce na hÉireann a éascú chun freastal ar riachtanais amach anseo. Tá maoiniú ilbhliantúil faighte i bpáirt againn trí Dhréachtchinneadh ón gCoimisiún um Rialáil Fóntais don Rialú Ioncaim 4 (RC4) lena gcuirtear cinnteacht éigin ar fáil maidir le cláir uaillmhianacha a sholáthar, ach meastar go mbeidh infheistíocht fhadtéarmach €60 billiún sa chéad 25 bliain eile (de réir théarmaí 2022), de dhíth chun seirbhísí uisce na hÉireann a athrú ó bhonn i ndáiríre.

Ag Féachaint ar Aghaidh

De réir mar a bhogaimid ar aghaidh, tá ár dtosaíochtaí soiléir: seachadadh bonneagair uisce agus fuíolluisce a luathú, aghaidh a thabhairt ar acmhainn agus seandúshláin, ár gcultúr láidir sábháilteachta a choinneáil ar bun, comhtháthú agus earcú ball foirne a chur chun cinn, agus tacú le hathrú ó bhonn chun tacú le spriocanna fáis agus inbhuanaitheachta na hÉireann.

Ba mhian liom buíochas a ghabháil leis an mBord, leis an bhfoireann Feidhmiúcháin, le gach ball foirne in Uisce Éireann, lenár gcomhpháirtithe seachadta, agus lenár gcomhghleacaithe sna hÚdaráis Áitiúla as a dtiomantas le linn 2025. Tá todhchaí inbhuanaithe á forbairt againn d’Éirinn, le chéile, agus seirbhísí uisce á soláthar lena gcumasaítear do phobail a bheith faoi bhláth.