Plean Náisiúnta na nIonad Beaga Cóireála Fuíolluisce

Cuir do Thuairimí in Iúl

Táimid ag forbairt plean náisiúnta nua le haghaidh ionaid cóireála fuíolluisce a fhreastalaíonn ar phobail níos lú ar fud na hÉireann agus ba mhaith linn do thuairimí a chloisteáil.

Le Plean Náisiúnta na nIonad Beaga Cóireála Fuíolluisce: Ag Tacú le Pobail agus ár dTimpeallacht Nádúrtha á Cosaint, treorófar conas a dhéanfar ionaid cóireála fuíolluisce a fhreastalaíonn ar phobail bheaga ar lú a gcoibhéis daonra (CD) ná 1000 a phleanáil, a mheasúnú agus a bhainistiú amach anseo.

Tacaíonn na hionaid cóireála fuíolluisce sin le tithe, gnólachtaí agus saol an phobail ar fud na hÉireann. Tá ról tábhachtach acu freisin maidir lenár n-aibhneacha, lochanna, inbhir agus uiscí cósta a chosaint. 

Is comhairliúchán luathchéime é seo ina bhfuil tuairimí á n-iarraidh ar an bPáipéar Saincheisteanna agus ar dhoiciméid chomhshaoil tacaíochta lena gcuirfear bonn eolais faoi fhorbairt an Dréachtphlean Náisiúnta.

Faightear ionaid bheaga cóireála fuíolluisce i bpobail ar fud na hÉireann.

Cé go bhfreastalaíonn gach ionad ar dhaonra measartha beag, is ionann na hionaid cóireála fuíolluisce bheaga agus formhór na n-ionad cóireála fuíolluisce atá á n-oibriú ag Uisce Éireann de réir an lín. Baineann dúshláin chomhchosúla le go leor acu, lena n-áirítear bonneagar atá ag dul in aois, brúnna comhshaoil, éileamh atá ag méadú ar acmhainn agus próisis chasta soláthair a bhféadfadh uasghráduithe a bheith deacair agus mall dá mbarr.

Tá Uisce Éireann freagrach as os cionn 1,000 ionad cóireála fuíolluisce ar fud na hÉireann, lena n-áirítear thart ar 800 ionad beag cóireála fuíolluisce a fhreastalaíonn ar phobail ina bhfuil níos lú ná 1,000 duine ina gcónaí.

Go stairiúil, is minic a breithníodh feabhsuithe ar bhonn láithreán le láithreán. Tá sé mar aidhm leis an bPlean seo bogadh i dtreo cur chuige náisiúnta níos comhordaithe agus níos fianaise-bhunaithe. 

Cuideoidh an plean leis an méid seo a leanas:

• Feabhas a chur ar cháilíocht an uisce.
• Tacú le pleanáil fhadtéarmach le haghaidh fás inbhuanaithe agus an timpeallacht á cosaint.
• Áit a bhfuil an ga is mó le huasghráduithe a shainaithint.
• Infheistíocht a dhíriú ar réimsí a mbeidh an tairbhe is mó ag baint leo.
• Creat trédhearcach comhsheasmhach ar an leibhéal náisiúnta a sholáthar le haghaidh cinnteoireachta.

Tá Bileog Measta Scóipe á fhorbairt againn don bPlean Náisiúnta na nIonad Beaga Cóireála Fuíolluisce. Féach ar an mbileog anseo.

Breithneofar sa Phlean ionaid cóireála fuíolluisce a fhreastalaíonn ar phobail ar lú a coibhéis daonra (CD) ná 1000 ar fud na hÉireann. Úsáidfear faisnéis ann faoi conas atá ionaid bheaga cóireála fuíolluisce ag feidhmiú faoi láthair, an acmhainn atá ar fáil acu, bail na n-aibhneacha, na lochanna, na n-inbhear nó na n-uiscí cósta ina nglactar a scaoileadh agus cuspóirí comhshaoil na n-uiscí glactha sin.

• Feidhmíocht reatha an ionaid.
• Acmhainn chóireála atá ar fáil.
• Cáilíocht an uisce agus dálaí timpeallachta.
• Riachtanais forbartha amach anseo.
• Cuspóirí comhshaoil agus ceanglais dhlíthiúla.

Cuideoidh an fhaisnéis sin le cá háit a dtagann fadhbanna chun chinn, cá bhféadfadh gá a bheith le huasghráduithe nó aistriú, agus cá bhféadfadh infheistíocht an tairbhe is mó a bhaint amach do phobail agus don timpeallacht a shainaithint, agus tionscadail atá ar bun cheana féin á gcur san áireamh.

Tá Páipéar Saincheisteanna, Tuarascáil Scóipe um Measúnacht Straitéiseach Timpeallachta (MST) agus Tuarascáil um Scagadh Measúnachta Cuí (MC) foilsithe againn chun tacú le forbairt Phlean Náisiúnta na nIonad Beaga Cóireála Fuíolluisce.

Le chéile, mínítear leis na doiciméid sin na príomhdhúshláin atá roimh sheirbhísí fuíolluisce i bpobail bheaga, leagtar amach na breithnithe comhshaoil a chuideoidh le tionchar a imirt ar an bPlean, agus tugtar deis leo do pháirtithe leasmhara cuidiú le bonn eolais a chur faoina fhorbairt ón gcéim is luaithe. Cuideoidh an t-aiseolas a gheofar le linn an chomhairliúcháin sin linn tuiscint níos fearr a fháil ar shaincheisteanna áitiúla, ar thosaíochtaí timpeallachta agus ar riachtanais an phobail agus muid ag ullmhú an dréachtphlean.

Ba mhaith linn do chuid tuairimí a fháil

Molaimid duit na doiciméid sin a athbhreithniú sula ndéanfaidh tú aighneacht. Cé acu is suim leat pobail áitiúla, cosaint na timpeallachta, fás amach anseo, cáilíocht an uisce nó pleanáil bonneagair, cuideoidh d’aiseolas le tionchar a imirt ar fhorbairt Phlean Náisiúnta na nIonad Beaga Cóireála Fuíolluisce. 

Tá cosaint cháilíocht an uisce agus na timpeallachta i gcroílár na hoibre seo.

Forbrófar Plean Náisiúnta na nIonad Beaga Cóireála Fuíolluisce: Ag Tacú lenár bPobail agus ár dTimpeallacht Nádúrtha á Cosaint i gcomhréir le dlí comhshaoil na hÉireann agus na hEorpa, lena n-áirítear ceanglais atá ceaptha chun cáilíocht an uisce, gnáthóga agus fiadhúlra a chosaint. Cuideoidh sé sin lena chinntiú go dtacóidh an Plean le cuspóirí comhshaoil náisiúnta agus idirnáisiúnta agus bunús níos soiléire agus níos comhsheasmhaí le haghaidh uasghráduithe amach anseo ar ionaid bheaga cóireála fuíolluisce á sholáthar.